Un viaggio nelle tradizioni e letteratura popolare che attraverso i versi dei nostri poeti dialettali esprimono pensieri sempre attuali

U POETA

Pueta esti cu leggi nto futuru
e vidi cosi chi nuddh’atru vidi.
Ora chi nci bbugghi u sangu di vint’anni,
e, puru, si senti randi e maturu.
E rridi e si ndi futti di so anni
e du duluri, da gloria e di ll’affanni.

Poi, quando rriv’a n’età, si senti nu giganti
chi teni tutt’u mundu nto so cori,
e du so cori nesciunu scintilli.
Du pueta nesciunu risati e chianti,
e jastimi, e malanovi, e disamuri.

Ma porta la so vita nte pupilli.

Ciangi cu cu perdi e cu ll’afflittu.
Rridi cu ccu vinci e cu ccu è forti,
si pensa chi ndavi a so ragiuni.

Capisci puru a curpa e lu dilittu,
loda li sagrifici e lu cunortu,
canta supr’un bbiccheri li canzuni.

Cusì, cu so pinseru, cogghi a milli
li raggi di lu suli la matina,
li faci divintari grand’armonia
semina menz’e genti ddhi scintilli,
e, comu si sù ffiammi, fà cisina,
dassandu a tutti l’atri, mmenz’a via.

Essiri pueta è nchianari supra nu munti
di notti quando u celu e chinu i stiddhi,
rruvari nta la cima, iasari l’occhiuzzi,
e poi, nginucchiuni, mbasciar’a frunti,
guardari la randizza e li luciddhi.
Poi scindir’o chianu e diri: su favuzzi.

Essiri pueta è passari, di la vita, u mari
Currendu arredu a ‘n sonnu, a n’illusioni,
chi non esistiu mai. Senza mi cridi
a nenti, ma essiri sicuru chi su cosi veri,
iri cantandu ogni jornu milli canzuni,
sulu nta lu so cantari, aviri sempri fidi.

Paolo Marcianò